سوشل میڈیا پر کڑا وار: میٹا کو اربوں کا جرمانہ، دنیا حیران

امریکہ کی ریاست نیو میکسیکو میں سوشل میڈیا کمپنیوں کے خلاف ایک بڑا قانونی فیصلہ سامنے آیا ہے، جہاں ایک جیوری نے ٹیکنالوجی کمپنی میٹا کو بچوں کی ذہنی صحت کو نقصان پہنچانے کے معاملے میں ذمہ دار قرار دیا ہے۔یہ مقدمہ 2023 میں ریاست کے اٹارنی جنرل Raúl Torrez کی جانب سے دائر کیا گیا تھا۔ الزام یہ تھا کہ کمپنی نے سوشل میڈیا کے مضر اثرات، خاص طور پر نوجوانوں میں اس کے نشے اور ذہنی دباؤ کے مسائل کو مکمل طور پر ظاہر نہیں کیا۔تقریباً سات ہفتوں تک جاری رہنے والی سماعت کے بعد جیوری نے یہ نتیجہ اخذ کیا کہ Meta Platforms نے صارفین کی حفاظت کے مقابلے میں اپنے کاروباری مفادات کو ترجیح دی۔ فیصلے میں کہا گیا کہ کمپنی نے بچوں کی ذہنی صحت اور جنسی استحصال سے متعلق خطرات کے بارے میں گمراہ کن معلومات فراہم کیں اور غیر منصفانہ کاروباری طریقے اپنائے۔

جیوری کے مطابق اس کیس میں ہزاروں خلاف ورزیاں سامنے آئیں، جن کی بنیاد پر کمپنی پر تقریباً 375 ملین ڈالر (یعنی قریب 3100 کروڑ روپے) کا جرمانہ عائد کیا گیا۔ دلچسپ بات یہ ہے کہ یہ رقم استغاثہ کی جانب سے مانگی گئی رقم سے کم ہے، جبکہ کمپنی کی مجموعی مالیت کھربوں ڈالر میں ہے۔فی الحال اس فیصلے کے تحت میٹا کو فوری طور پر اپنے پلیٹ فارمز میں بڑی تبدیلیاں کرنے کا حکم نہیں دیا گیا۔ اب یہ فیصلہ ایک جج کرے گا کہ آیا کمپنی کے پلیٹ فارمز واقعی عوامی نقصان کا سبب بنے اور کیا مزید اقدامات ضروری ہیں۔ اس کیس کی اگلی سماعت مئی میں متوقع ہے۔دوسری جانب کمپنی کے ترجمان نے اس فیصلے سے اختلاف کرتے ہوئے کہا ہے کہ وہ اس کے خلاف اپیل کرے گی۔ ان کا مؤقف ہے کہ کمپنی مسلسل اپنے پلیٹ فارمز کو محفوظ بنانے اور نقصان دہ مواد کو ہٹانے کے لیے اقدامات کر رہی ہے، اگرچہ بعض مواد سسٹم سے بچ نکلتا ہے۔
اس مقدمے کے دوران یہ بھی دیکھا گیا کہ کمپنی نے کم عمر صارفین کے تحفظ، خودکشی سے متعلق مواد، اور ایسے الگورتھمز کے بارے میں کس حد تک معلومات فراہم کیں جو نقصان دہ مواد کو فروغ دے سکتے ہیں۔ یہ کیس ان بڑھتے ہوئے قانونی اقدامات کا حصہ ہے جو دنیا بھر میں سوشل میڈیا پلیٹ فارمز کے خلاف کیے جا رہے ہیں۔