نئی دہلی میں الیکشن کمیشن کی قومی گول میز کانفرنس، ووٹر لسٹ کی شفافیت پر زور
ملک بھر کے انتخابی اداروں کی قومی سطح کی گول میز کانفرنس منگل کو نئی دہلی کے بھارت منڈپم میں منعقد ہوئی، جس میں ووٹر لسٹ کی تیاری اور نظرثانی کے عمل کو مزید مؤثر اور شفاف بنانے پر تفصیلی گفتگو کی گئی۔ قابل ذکر بات یہ ہے کہ اس نوعیت کی کانفرنس تقریباً 27 برس بعد منعقد ہوئی ہے، اس سے قبل آخری اجلاس 1999 میں ہوا تھا۔کانفرنس کی صدارت چیف الیکشن کمشنر گیانیش کمار نے کی۔ اجلاس کا بنیادی مقصد عوامی نمائندگی ایکٹ 1950 کے تحت ووٹر فہرستوں کی تیاری، ان کی جانچ اور متعلقہ قوانین پر عمل درآمد کا جائزہ لینا تھا۔ اس موقع پر ووٹر لسٹ کو زیادہ درست، جامع اور قابل اعتماد بنانے کے اقدامات پر بھی تبادلہ خیال کیا گیا۔اجلاس میں الیکشن کمشنر سکھبیر سنگھ سندھو اور وویک جوشی بھی شریک تھے۔ ملک کی تمام ریاستوں اور مرکز کے زیر انتظام علاقوں کے ریاستی الیکشن کمشنرز اپنے قانونی اور تکنیکی ماہرین کے ساتھ اس کانفرنس میں موجود رہے۔اس کے علاوہ 36 ریاستوں اور مرکز کے زیر انتظام علاقوں کے چیف الیکٹورل افسران نے بھی شرکت کی، جہاں انتخابی عمل میں شفافیت، ٹیکنالوجی کے استعمال اور ووٹر رجسٹریشن کے نظام کو مزید مضبوط بنانے جیسے امور زیر بحث آئے۔یہ کانفرنس انتخابی نظام کو جدید تقاضوں سے ہم آہنگ کرنے اور جمہوری عمل کو مزید مستحکم بنانے کی سمت ایک اہم قدم قرار دی جا رہی ہے۔
About the Author
